နှင်းဆီပွင့်ပေါ် ဆရာ အိပ်ပျော်အုန်းမှာမဟုတ်ဘူး

လွန်ခဲ့တဲ့တနှစ် ဆရာဦးတင်မိုး ဆုံးတယ်ကြားရတော့ မိုးမခမှာ ဆရာ့ကိုလွမ်းလို့ ကဗျာတပုဒ်နဲ့ ကန်တော့ခဲ့ပါတယ်။ အခုလည်း ဆရာ့ကိုချစ်သူတွေက ကမ္ဘာတ၀ှမ်းမှာ နှစ်ပတ်လည် လွမ်းဆွတ်ပွဲတွေ ကျင်းပနေကြတာ ကြားရတယ်။ ကျနော်တို့ မြန်မာတွေရဲ့နှလုံးသားမှာ အမြဲတမ်း ထွန်းလင်းနေမယ့် မီးအိမ်ရှင်ကြီး သူချစ်တဲ့တိုင်းပြည်မှာ အကြိမ်တထောင် လူပြန်ဖြစ်ခွင့်ရပါစေ။

သစ္စာမီးအိမ်

အင်းလျားကန်စပ်
မှန်ကလေးတချပ်
ဖြတ်ကနဲကွဲခဲ့တာမှမဟုတ်ပဲ။

စကားလုံးတွေက အစစ်လား
လောကကြီးက အစစ်လား
အနုပညာဆိုတာ
မေတ္တာဓါတ်နဲ့မှ လှတယ်၊
ညအခါမှာမှ
လသာတာက လှတယ်၊
အဆန်ခရီးမှာမှ
ဖန်မီးအိမ်က ပိုလို့လင်းခဲ့တယ်။

ချစ်ခြင်းတရားမှာ
အကြေအညာမရှိဘူး
သစ္စာတရားမှာ
သေတယ်ရှင်တယ်မရှိဘူး။

လူထုချစ်ရင်
သမိုင်းတင်တယ်
(ကျနော်တို့မှာတော့)
ကမ္ဘာမကြေဘူး
ဆရာမသေဘူး။ ။

နှင်းခါးမိုး